Emakumeenganako indarkeriaren aurkako nazioarteko eguna
Bizkaiko Foru Aldundiaren azaroaren 25eko kanpainak emakumeek jasaten duten indarkeriarekiko nazka erakusten du
• Leloa: “Lor dezagun aurtengoa azken A25 izatea. Bat gehiago ere ez”.
• Azken hamarkadan gizonek 15 emakume hil dituzte Bizkaian.
• Laespada: “Geure buruak aske, seguru eta bizirik nahi ditugu”.
Bilbo, 2022ko azaroaren 15a.-
Bizkaiko Foru Aldundiak kanpaina bat abiarazi du azaroaren 25erako, Emakumeenganako Indarkeriaren Aurkako Nazioarteko Eguna. Kanpaina horren leloa “Lor dezagun aurtengoa azken A25 izatea. Bat gehiago ere ez” da eta Giza Eskubideak behin eta berriz urratzearekiko nazka adierazten du.
Kanpainaren aurkezpen-ekitaldi baten hainbat material banatu da Bilboko Emilio Campuzano Lanbide Heziketako Zentroko ikasleen artean eta bertan Teresa Laespadak, Enplegua, Gizarte Inklusioa eta Berdintasuna Sustatzeko foru diputatuak gogorarazi du gure Lurralde Historikoan azken hamarkadan 15 emakume asasinatu dituztela eta Bizkaian urtero bi mila emakumek baino gehiagok jasaten dutela indarkeria matxistaren bat. Iaz, zehatz esanda, 2.307 emakume izan ziren.
“Emakumeok argi eta garbi esaten dugu nazkatuta gaudela eta ezin dugula heriotza bat gehiago jasan. Ez beste erasorik, ez indarkeria matxista gehiagorik” azpimarratu du diputatuak.
Ildo horretatik, gogorarazi du “indarkeria matxista desberdintasunean oinarritutako gizarte baten emaitza dela”, eta “emakumeen aurkako erasoak eta hilketak desberdintasun horren adierazlerik larriena direla, baina zeharkako errealitate bat dela, eta emakumeei kalte egiten diela, neurri handiagoan edo txikiagoan, bizitzako esparru guztietan”.
DATUAK
Iaz, Bizkaian 2.307 emakumek jasan zuten indarkeria matxistaren bat, Ertzaintzak eta gainerako polizia-kidegoek erregistratuta dituzten datuetan behintzat. 2.307 emakume horiek mota askotako 2.908 indarkeria-ekintza matxista jasan zituzten, eta horietatik % 72k bikotekideak edo bikotekide ohiak izan zituzten protagonista.
Eta zeharkako indarkeria da zentzu guztietan. Izan ere, iazko zifra horiek Bizkaiko 86 udalerritan gertatutako emakumeen aurkako indarkeria-ekintzei dagozkie, hau da, gure Lurralde Historikoko biztanleriaren % 99 hartzen dutenak.
Datu hauek guztiak Bizkaiko Indarkeria Matxistaren Behatokiaren webgunean kontsulta daitezke: https://web.bizkaia.eus/es/observatorio-de-la-violencia-machista.
BIKTIMEI ARRETA ESKAINTZEA
Laespadak bere Sailak garatzen duen harrera- eta laguntza-sarea gogorarazi du, iaz 228 pertsona artatu zituen berehalako harrera-zentro batekin: 131 emakume, 96 seme-alaba eta mendeko pertsona heldu bat.
Bizkaiko Aldundiak egonaldi ertain eta luzeko harrera-zentroak ere baditu, eta iaz horietan 94 pertsona artatu ziren: 51 emakume, 43 seme-alabarekin.
Era berean, datorren urtean sexu-erasoen biktimei laguntzeko zentro berri bat jarriko da martxan. Egunean 24 orduz eta astean zazpi egunez artatuko duen zentroa da. Eta emakume horiei laguntza psikologikoa, juridikoa eta soziala emateko programa bat ere izango du.
KANPAINA
Diputatuak azaldu duenez, kanpainak “feminismoaren eta emakumeen indarra bistaratu nahi du matxismorik gabeko gizarte baten aldarrikapen honetan”, “emakume desberdinekin” egindako grafiko batzuekin, “baina guztiak mezua zabaltzeko indar eta erabakitasunez beteta, umiliazioak, irainak, erasoak eta hilketak amaitzeko”. “Geure buruak aske, libre, seguru eta bizirik nahi ditugulako” erantsi du.
Kanpainaren helburua asmo handiko hedabide-plan baten bidez Bizkaiko herritar ia guztiengana iristea da; plana prentsa tradizionaletik hasi eta gaur egun gehien erabiltzen diren sare sozialetara zabalduko da, eta garraiobideetako kanpo-publizitatea ere egingo da.
Era berean, materiala banatuko da 6.300 dendatan, 230 ikastetxetan, eskola-kiroleko 643 erakundetan, 71 kiroldegitan, 171 osasun-zentrotan eta mota guztietako 469 erakunde eta elkartetan. Laguntzaileen artean daude, besteak beste, Athletic Club, Bilbao Basket, Lointek Gernika, Balonmano Zuazo edo Lutxana Arraun Taldea bezalako kirol profesionaleko taldeak.